Link açıqlığı

Qırımnıñ Rusiye başı Sergey Aksenov Qırımnı ukrain territoriyası olaraq tanığan içtimaiy ağlarnıñ siyasetine «Qırım cevabını» bermege çağıra. Bu aqta Aksenov Facebookta bildirdi.

«Sizni Qırımnı ukrain territoriyası olaraq tanığan içtimaiy ağlarnıñ, şu cümleden Facebook, siyasetine Qırım cevabı olğan aktsiyalarımızğa qoşulmağa çağramız. Bu ufaq-tüfek bir şey degil, memleketimiz ve cumhuriyetimizge qarşı sankitsâlar ve haber cenkiniñ qısmıdır», – dedi o.

Aksenov «Qırım ve Rusiye vatanperverlerini» yanvar 20-de qırımlılarnı «Qırım Cumhuriyet Künü» ile hayırlamağa çağırdı.

«Lâqaytsız insanlarnı, Qırım ve Rusiye vatanperverlerini Qırım ile bağlı beyanatlarında ‪#‎KrımRossiyaNavsegda (#QırımRusiyeEbediyen) hashtagını qullanmağa çağıram. Tuvğan toprağımız, Rusiyege olğan sevgimizni köstereyik! Böyleliknen, er kes Rusiye Federatsiyasınıñ eñ yaş subyektini bayram ile hayırlay bile», – yazdı Aksenov.

O şunı da bildirdi ki, yanvar 20 künü Aqmescitte «Doğğan künüñ hayırlı olsun, yaş cumhuriyet!» şiarı altında yaşlar teşkilâtlarınıñ yürüşi keçirilecek.

1991 senesi yanvar 20 künü Qırım Muhtar Sovet Sotsialistik Cumhuriyetiniñ ğayrıdan tiklenmesine umumqırım referendumında Qırım sakinleriniñ 93,26% qol tuttı. Rey berüvge: «Siz Qırım Muhtar Sovet Sotsialistik Cumhuriyetiniñ SSCB subyekti ve İttifaq añlaşmasınıñ iştirakçisi olmasına qol tutasıñızmı?» suali çıqarıldı.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG