Link açıqlığı

Qırım qamaçavı boyunca aktsiyasınıñ idarecisi Lenur İslâmov 2014 senesi Rusiye tarafından işğal etilgen yarımadanıñ qaytarılmasınıñ arbiy stsenariyi ola bilecegini tüşüne. Bu aqta o yanvar 19 künü Qırım.Aqiqat Radiosınıñ efirinde bildirdi.

«Qırımnıñ azat etilmesiniñ barışıq stsenariyine inanmayım, amma bu menim şahsiy noqtaiy-nazarımdır», – dey İslâmov.

Bunıñ ile o, Rusiyede iqtisadiy qıyınılıqlarnıñ olmasından sebep yarımadada adiselerniñ inkişafını tahmin etti.

«Böyle olacaq dep tüşünem: sanktsiyalar basar, menimce, Putinni (Rusiye prezidenti – QA) yaqın istiqbalde quvarlar, öz soñki uruşını etmege isteycek arbiy hunta kelir. Çünki olar buña o qadar vaqıt devamında azırlıq kördi. Olar içün Qırımnı qaytarmağa tırışacaq er bir siyasetçiniñ tarafından satqınlıq olaraq körünir», – dey İslâmov.

Qırım.Aqiqat Radiosınıñ diger musafiri, «Pravıy sektor»nıñ spikeri Aleksey Bık dey ki, «Ukrainada şimdi Qırım qaytaruvınıñ yolları yoq».

«Qırımnı Ukrainağa qaytarmaq içün ne diplomatik, ne arbiy yollarnı köremiz. Amma, böyle yollarnıñ peyda olması içün fırsatlarnı birlikte meydanğa ketire bilemiz. Şimdi pek qıyın vaziyet, siyasiy, ve diplomatik yollar biz içün, arbiy kibi, qapalıdır», – dey Bık.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG