Link açıqlığı

Ukraina Milliy gvardiyası: qırımtatar batalyonı qanun çerçivesinde areket etmeli


Ukraina Milliy Gvardiyasında deyler ki, olarnıñ terkibinde teşkil etilecek qırımtatar batalyonı aqqında beyanatlar şimdi beyanat şeklnde qala ve qanun ceetinden daa amelge keçmedi.

Böyleliknen Milliy Gvardiya spikeri Svetlana Pavlovskaya Qırım.Aqiqat Radiosı efirinde Qırım qamaçavınıñ idarecisi Lenur İslâmovnıñ bildirüvini izaatladı.

«Özüne böyle bildirüvlerni etmek içün mesüliyetni alğan ayrı insannıñ teşebbüsidir. Şunı ayta bilem ki, Ukraina Milliy Gvardiyası qanuniyet çerçivesinde areket ete», – dedi o.

Milliy Gvardiya spikeri teşebbüsniñ Ukraina qanuniyeti çerçivesinde amelge keçirilmek kerekligini qayd etti.

«Belgilengen vazifeler bar, silâlı insanlar. Mütenasip qanuniy çerçiveler, Ukraina qanuniyeti ve halqara qanuniyet ceetinden belgilene. Avropağa ketmege isteymiz. Qanuniyetiniñ eyileşüvi üzerinde çalışamız ve muayyen sıñırlar bar olğanını añlamaq kerekmiz», – dep qoştı Pavlovskaya.

Efir musafiri Lenur İslâmov ise «spikerler bir şey çezmey» dep qayd etti. «Bu memlekette spikerler bir şey al etmey, olarnı bunı aytıñ deyler, olar ayta».

Qırım qamaçavı boyunca vatandaşlıq aktsiyasınıñ yetekçisi Lenur İslâmov Herson vilâуеtinde teşkil etilgen qırımtatar göñülli batalyonına 250 insan yazılğanı aqqında bildirdi.

İslâmov 2015 senesi dekabr ayında Noman Çelebicihan adına qırımtatar göñülli batalyonınıñ teşkil etilecegi aqqında bildirdi. Bu ğayege Qırımtatar Milliy Meclisiniñ reisi Refat Çubarov qol tuttı.

Qırım ve Aqyar musulmanları diniy idaresi işbu ğayeni takbih etti ve yaşlarnı yarımadanı terk etmemek çağırdı.

XS
SM
MD
LG