Ukrainada yanvar 17 künü Nazirler kabinetiniñ Qırım ile memuriy sıñırdan mal ve hızmetlerniñ keçirilmesi aqqında № 1035 qararı amelge keçti.
Qararda qayd etilgeni kibi, Qırım ile memuriy sıñırdan tek şahsiy şeylerni keçirmege mümkün olur. Vesiqada er şey tafsilâtlı şekilde añlatılğan.
Aşayt mallarından ukrain gümrükçileriniñ blok-postlarından tek «içtimaiy emiyeti olğan» erzaqnı keçirmege mümkün. Cedvelge 21 serleva kire: un, ötmekniñ üç çeşiti, etniñ üç çeşiti, makaron, qara boğday, pirniç ve ilâhre. Bu cedvelde olğan malnıñ yükü bir insanğa 50 kg ziyade olmamalı, fiyatı ise – 10 biñ grivnadan ziyade olmamaq kerek.
Qararda tek aşayt mallarına degil de, şahsiy şeylerge de sıñırlav kirsetile. Vesiqağa köre, Ukraina Gümrük qanunnamesiniñ 370-nci maddesinde qayd etilgen şeylerni keçirmek mümkün (urba, tehnika ve ilâhre).
Qırımğa mal ketirilmesiniñ yasağı aqqında qararnı sentâbr 20 künü başlanğan «Qırım vatandaşlıq qamaçavı» aktsiyasınıñ iştirakçileri qabul etmege talap etti.
