Qırımtatar Milliy Meclisi reisiniñ muavini İlmi Ümerov qıtaiy Ukrainada Qırım Müftiyligini teşkil etmek qararınıñ esas sebebi olaraq – Qırım musulmanları diniy idaresiniñ şimdiki başı hacı Emirali Ablayevniñ «kollaborant mevamını» ve yarımadanıñ işğalden azat etilmesi oğrunda kürşeken qırımtatarlarnıñ liderlerine olğan munasebetini qayd etti.
Bunı o yanvar 18 künü Qırım.Aqiqat Radiosınıñ efirinde bildirdi.
«Qırım musulmanlarınıñ şimdiki müftisiniñ areketleri çoqtan qırımtatarlarnı açuvlata. Çünki o açıq-aydın sürette satqınlıq mevamını aldı, Rusiye Federatsiyasınıñ müftiler şurasına kirdi. Şunıñ içün Qırım tışında, qıtaiy Ukrainada yaşağan qırımtatarlarnıñ büyük qısmı Qırım Müftiyliginiñ tesirinden çıqtı. Sebeplerden biri. Esas sebebi ise – kollaborant mevamı. Sergey Aksenov (Qırımnıñ Rusiye başı – QA) ile körüşüvde o (müfti – QA) dedi: «Siziñ dostlarıñız – menim dostlarım, siziñ duşmanlarıñız – menim duşmanlarım», yani bütün dünya boyunca qırımtatarlarnıñ aqlarını qoruğan qırımtatarlarnıñ yetekçileri onıñ duşmanı oldı. Şunıñ içün müftini qıtaiy Ukrainada saylamağa ğaye peyda oldı», – dey o.
Keçken raatlıq künleri Herson vilâyetinde Bütündünya qırımtatar kongressiniñ idare şurasınıñ toplşauvı keçti. Mında Qırım müftisiniñ areketlerini takbih ettiler ve qıtaiy Ukrainada Qırım Müftiyligini teşkil etmek teşebbüsi seslendirildi.
