Bütündünya qırımtatar kongressiniñ icraiy komitetiniñ nevbetteki toplaşuvı Litvaniyada keçecek. Bu qararnı yanvar 16 künü Herson vilâyeti Geniçesk rayonında icraiy komitetniñ toplaşuvı devamında alındı, dedi Qırım.Aqiqatqa icraiy komitetniñ azası Ali Оzenbaş.
Onıñ sözlerine köre, toplaşuv devamında bir sıra mesele muzakere etildi. Şu cümleden, evelki toplaşuv qararlarınıñ amelge keçirilmesi boyunca esabatnı diñlediler.
Cumaertesi künü, yanvar 16-da, Herson vilâyetiniñ Geniçesk rayonında Bütündünya qırımtatar kongressiniñ icraiy komitetiniñ üçünci toplaşuvı keçti. Toplaşuv iştirakçileri qıtaiy Ukrainada Qırımtatar Müftiyliginiñ teşkil etilmesi aqqında meseleni kötelrdiler. Qırımtatarlarnıñ yetekçileri Mustafa Cemilevniñ fikrine köre, Qırım Müftiyligi şimdi «işğalcige boysunğan».
Qırım.Aqiqat mühbiri bildirgeni kibi, cumaertesi künü Kongressniñ icrai komitetiniñ azaları toplaşuvnı keçirdi, soñra «Çonğar»da Qırım qamaçavı boyunca aktsiyanı ziyaret ettiler. Aqşam iştirakçiler ögünde qırımtatar bediiy taqımları çıqışta bulundı. Bundan soñ ATR qırımtatar telekanalı komitet azaları ile canlı efirni keçirdi, onıñ devamında seyirciler olarğa meraqlandırğan suallerni qoydı.
BQTK icraiy şurası 2015 senesi avgust 1-2 künleri Ankarada saylanıldı.
