Yanvar 16-dan 17-ne keçer gecesi Qırımnıñ İçki rayonı Çatmış köyüniñ yerli meclis reisi Enver Veysovnıñ azbarında yanğın yüz berdi. Bunı Facebook saifesinde Qırımtatar Milliy Meclisi reisiniñ birinci muavini Nariman Celâl bildirdi.
«Piçen obası tutaştı, yanğın maşinağa keçti, o da yandı. Yanğınnı söndürmege tırışqan Enver yanıqaları ile hastahanede yata. Fevqulâde vaziyet nazirliginiñ hadimleri maşinanıñ yanıp tutaşqanını bildire. Enverniñ özü qomşu ile munasebetleri zor olğanı aqqında dey, olarnıñ siyasiy baqışları farqlı olğanından sebep qomşusı onı Molotov qarışması ile qorquza edi», – yazdı Celâl.
O işbu vaqianı milletlerarara sebebinden yüz bergen ziddiyet olaraq tanıy. Celâl dey ki, çoqusı allarda uquq qoruyıcılar ve bu kibi ziddiyetlerniñ iştirakçileri bu aqta pek laf yürsetmemek tırışa.
Qırımnıñ Rusiye uquq qoruyıcıları Enver Veysovnıñ evindeki yanğınnı şimdilik izaatlamaylar.
