Cumaertesi künü, yanvar 16-da, Aqmescitte «Qırım musulman ümmetiniñ birligine yañı çağıruvlar» adlı qırımtatar din erbapları ve cemaat teşkilâtlarınıñ bütünqırım konferentsiyası keçecek, dep bildire Qırım ve Aqyar musulmanlarınıñ diniy idaresiniñ matbuat hızmeti.
Malümatqa köre, konferentsiya yerli vaqıt boyunca saat 11:00 açılacaq, maqsadı – «Qırım musulmanları ümmetiniñ birleşüv yollarını muzakere etmek ve dinniñ siyasiy maqsatlarda qullanuv areketlerine qıymet kesmek».
«Konferentsiyanıñ aktualligi Cumhuriyet tışında bulunğan ayrı siyasetçilerniñ Qırım musulman ümmetini bölmek ve Ukrainada bu kibi diniy teşkilâtnı meydanğa ketirmek ıntıluvları ile bağlı. Qırımtatar halqını Ukraina territoriyası Herson vilâyetinde qanunsız silâlı teşkilâtlandıruvlarda iştirak etmek çağıruvları ile Qırım musulmandarı diniy yetekçisi, Müfti hacı Emirali Ablayevni itibardan tüşürmek», – denile beyanatta.
QMDİ malümatına köre, Bütünqırım qırımtatar din erbapları ve cemaat teşkilâtlarınıñ konferentsiyasında Qırımnıñ bütün regionlarından 350 musulman cemiyeti, 42 qırımtatar siyasiy ve cemaat teşkilâtlarnıñ temsilcileri, qırımtatar ziyallıları, tasil ve medeniyet hadimleri, cemaat erbapları iştirak etecek. Bu sırada – Rusiye musulman teşkilâtlarınıñ yetekçileri.
Yanvar başında QMDİde keçirilgen rayon imamları ve diniy teşkilâtlar reisleriniñ toplaşuvında «Ukrainada faaliyet körgen bazı vatandaşlarnıñ Qırım musulmanlarını bölmek ıntıluvları» boyunca qasevet bildirilgen edi.
Bundan evel Ukraina prezidentiniñ qırımtatar halqı işlerinden vekâletlisi Mustafa Cemilev qıtaiy Ukrainada QMDİ teşkil etilecegi aqqında bildirdi. Cemileniñ aytqanı kibi, Qırım Müftiyligi şimdi «işğalcige boysunğan».
