Link açıqlığı

Cumaertesi künü, yanvar 16-da, üylede Qırım qamaçavı boyunca vatandaşlıq aktsiyasınıñ faalleri Herson vilâyetinde memuriy sıñırda blok-postlarını terk etecek.

Qırım.Aqiqatqa aktsiya ştabınıñ komandanı Lenur İslâmov bildirdi.

«Nazirler kabinetiniñ qararı çıqtı, oña köre işğal etilgen territoriyağa yüklerni ketirmege mümkün degil, işğal etilgen territoriyadan da aynı. Biz onı qabul ettik, çünki artıq bugünki şekilde devam etmege acet körmeymiz. Şimdi qamaçavnıñ şeklini deñiştiremiz», – dey İslâmov.

Onıñ sözlerine köre, üylede faaller naqliyatnıñ teşkerüvi içün turğan blok-postlarnı ala, amma nezaret noqtaları qala. Bunıñ ile faaller vatandaşlıq birligini teşkil ete, qamaçav yetekçisi aytqanı kibi, onı şimdi qayd etmekteler. Bundan soñ bu vatandaşlıq teşkilâtı Qırım ile memuriy sıñırda kiriş-çıqış nezaret noqtasına keçecek.

«Men Viktor Aleksandroviç Nazarenko ile subetleşem – Ukraina Sıñır hızmetiniñ başı, Qırımdandır, vatanperverdir. Bundan da ğayrı, mında olğan bütün noqtalarnıñ reberleri ve olarnıñ muavinleri ile bağ tutamız ve er bir areketimiz Ukraina sıñır hızmeti ile uyğunlaştırıla. Faaller nezaret kiriş noqtalarında olacaq», – dey İslâmov.

O, faallerniñ devlet organları işine qarışmaycağını bildirdi. Teşkilâtnıñ iştirakçileri yalıñız nezaret etecek ve başta bir talimattan keçecek.

Ukraina Devlet sıñır hızmetinde aytılğanı kibi, Qırım qamaçavı boyunca aktsiyada iştirak etken faaller öz faaliyetini Qırım ile memuriy sıñırda olğan nezaret kiriş noqtalarına avuştırıp olamaz. Qırım.Aqiqatqa Devlet sıñır hızmetiniñ reberi Оleg Slobodân aytqanı kibi, memurlar faallerge bu kibi meselelerni añlatqan edi.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Qamaçav iştirakçileriniñ talapları arasında – siyasiy mabüslerniñ azat etilmesi, Qırımda insan aqlarına riayet etüv ve yarımadağa halqara eyyetlerniñ kirsetilmesi.

XS
SM
MD
LG