Aqyarnıñ Rusiye valisi Sergey Menâylo Ukraina prezidenti Petro Poroşenko ilân etken «Jeneva plüs» şekliniñ effektivligine inanmay.
Bunı Menâylo yanvar 15 künü Facebook saifesinle bildirdi.
«Ukraina prezidenti Qırımnıñ qaytaruvı içün «Jeneva plüs» şeklini meydañga ketirecek ola… Kâğıtta er şey ter-tegiz – bu efendiler çeşit koalitsiyalarnı teşkil ete bileler, «Jeneva plüs», «Jeneva eki plüs», «Beşinci nesilniñ Jenevası». Bütün olarnıñ ğayeleri Çonğardan uzaq ketmez», – yazdı Menâylo.
Ukraina prezidenti Petro Poroşenko Qırımnıñ işğal etilmesi boyunca muzakerelerniñ yañı halqara şeklini kirsetmek zaruriyeti aqqında bildire. Yanvar 14 künü Poroşenko matbuat konferentsiyasında işbu muzakerelerge Ukrainanıñ Avropa birligi ve AQŞ şeriklerini celp etmege kerek olğanını qayd etti.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
