Link açıqlığı

Qırımda «fevral 26 işi» iştirakçilerine qabaat seslendirildi ve yanvar 25-ne qadar teneffüs ilân etildi


Qırımnıñ Rusiye prokurorı Natalya Pokonskaya «fevral 26 işi» iştirakçilerine qabaatnı seslendirgeninden soñ, Qırımnıñ Rusiye Yuqarı mahkemesi toplaşuvlarda yanvar 25 qadar teneffüsni ilân etti.

Bunı Nikolay Polozov – iş iştirakçilerinden biri – Qırımtatar Milliy Meclisi reisiniñ birinci muavini Ahtem Çiygoznıñ advokatı Qırım.Aqiqatqa bildirdi.

«Yanvar 25 künü mahkeme taqiqatı başlana», – dedi o.

Polozov cuma künü keçirilgen toplaşuvda Poklonskayanıñ Ahtem Çiygoz, Mustafa Degermenci ve Ali Asanovğa qabaatnı seslendirgeni aqqında bildirdi. Bundan evel mahkeme advokatlarnıñ toplaşuvda matbuat vastalarınıñ temsilcileri ve er istegen insannıñ bulunmağa imkânı olmağanı içün onı diger salonlarğa yayınlamaq ricasını red etti.

«Rusiye mahkemeleriniñ ameliyatına baqmadan, atta mahkemeden evel maznunlar ile foto çekmege imkân yoq», – qayd etti advokat.

Oınñ sözlerine köre, Poklonskaya mahkeme toplaşuvlarınıñ qapatılmasında israr ete edi.

Polozov nevbetteki toplaşuvlarnıñ vaqtında başlanmasına ümüdini bildirdi, çünki bugünki toplaşuv mahkeme bulunğanlarnıñ teşkerüvi sebebeinden ğayet sozğaldı.

«Teşkiliy qısım uzun edi. Poklonskayanıñ ve qaravullarnıñ bulunması… toplaşuv bir buçuq saatke keçiktirildi, er kesni teşkere ediler. Mahkeme toplaşuvları öyle devam etse, advokatlarnıñ şaqa etkeni kibi, mesüliyetke celp etüv müddeti soñuna yeter», – qayd etti Polozov.

Toplaşuvnıñ başlanmasından evel Rusiye mahsus hızmetileri Qırım jurnalisti Zair Akadırovnı yaqaladı ve bir saat devam etken sorğudan soñ azat ettiler.

Mustafa Degermenci, Ali Asanov ve Ahtem Çiygoz bir buçuq yıl evelsi fevral 26 künü Qırım parlamenti yanında Ukraina topraq bütünliginiñ tarafdarları ve «Russkoye yedinstvo» («Rusiye birligi») firqasınıñ faalleri arasında teşkil olunğan «kütleviу tertipsizliklerde» iştirak etüvleri içün qabaatlana.

XS
SM
MD
LG