Yanvar 15 künü «fevral 26 işi» boyunca keçirilecek mahkeme toplaşuvına davet etilgen insanlarnıñ cedveli 80 insandan ibaret. Olar zarar körgen şahıslar olaraq davet etilgen. amma er kes kelmegen. Bunı Aqmescitte mahkeme binası kirişinde mahkeme hadimi bildirdi, haber ete Qırım.Aqiqat.
Bu sebepten ve toplaşuvda bulunmağa istegenlerniñ sayısı büyük olğanından sebep salonğan er kesni kirsetmeyler, atta federal matbuat vastalarınıñ temsilcilerini de.
Nikolay Polozov – iş iştirakçilerinden biri – Qırımtatar Milliy Meclisi reisiniñ birinci muavini Ahtem Çiygoznıñ advokatı – salonnıñ ufaq olğanını qayd ete. O, toplaşuvğa esas qabaatlayıcı – Qırımnıñ Rusiye prokurorı Natalya Poklonskayanıñ kelmesini bildirdi.
Mahkeme toplaşuvınıñ başlanması 1,5 saatke keçiktirildi.
Qırımnıñ Rusiye Yuqarı mahkemesi yanvar 15 künü Meclis reisiniñ muavini Ahtem Çiygoz, Mustafa Degermenci, Ali Asanovğa nisbeten «fevral 26 işi» boyunca qabaatnı seslendirecek.
Mustafa Degermenci, Ali Asanov ve Ahtem Çiygoz bir buçuq yıl evelsi fevral 26 künü Qırım parlamenti yanında Ukraina topraq bütünliginiñ tarafdarları ve «Russkoye yedinstvo» («Rusiye birligi») firqasınıñ faalleri arasında teşkil olunğan «kütleviу tertipsizliklerde» iştirak etüvleri içün qabaatlana.
