Aqmescitte politsiya hadimleri «fevral 26 işi» boyunca keçirilgen mahkeme toplaşuvına kelgen jurnalist Zair Akadırovnı onıñ zenaat faaliyeti aqqında soraştırdı ve bir saat devam etken sorğudan soñ azat ettiler. Bunı Akadırov Qırım.Aqiqatqa bildirdi.
«Rayon bölüginde meni faaliyetim, yaşağan yerim, qayda, ne ve ne maqsat ile yazğanım aqqında soradılar. Bunı «añlatuv» olaraq adladılar. Ceplerimni baqtılar, olğan şeylerimni aldı, amma soñra qaytardılar. Pasportımnıñ köpyasını çıqarıp, azat ettiler», – dey o.
Bunıñ ile, jurnalistniñ aytqanına köre, onı mecburen Ekstremizmge qarşılıq boyunca merkezge alıp ketmege istey ediler, qorquzdılar.
«Meni mahkeme binasında yaqaladılar, qanunsız tarzda kamerağa çıqarğanım ve telefonımda bir şeylerni qayd etkenim aqqında aytıp, ekstremizmge qarşılıq boyunca merkezge barmağa rica ettiler. Buña qarşı çıqtım. Menden pasportımnı tutıp almağa tırıştılar, qollarına bermedim. Bundan soñ politsiya kapitanı «Berkut»nı çağırdı, meni qollarımdan tutıp, maşinağa oturttılar. Qarşı çıqsam, kelepçelerni taqıp, uruğa yollaycaq oldılar», – dey Akadırov.
Qırımnıñ uquq qouyıcı organları bunı izaatlamay.
Qırımnıñ Rusiye Yuqarı mahkemesi yanvar 15 künü Meclis reisiniñ muavini Ahtem Çiygoz, Mustafa Degermenci, Ali Asanovğa nisbeten «fevral 26 işi» boyunca qabaatnı seslendirecek.
Mustafa Degermenci, Ali Asanov ve Ahtem Çiygoz bir buçuq yıl evelsi fevral 26 künü Qırım parlamenti yanında Ukraina topraq bütünliginiñ tarafdarları ve «Russkoye yedinstvo» («Rusiye birligi») firqasınıñ faalleri arasında teşkil olunğan «kütleviу tertipsizliklerde» iştirak etüvleri içün qabaatlana.
