Link açıqlığı

Advokat: Aqmescitte «fevral 26 işi» boyunca toplaşuv keçirilgen mahkeme binası yanında qırımtatar jurnalistini yaqaladılar


Qırım advokatı Emil Kurbedinov dey ki, Aqmescitte, Qırım Yuqarı mahkemesiniñ binası yanında, «fevral 26 işi» boyunca mahkeme toplaşuvınıñ başlanmasını beklegen qırımtatar jurnalisti Zair Akadırovnı yaqaladılar.

«Ekstremizmge qarşılıq boyunca merkezniñ hadimleri tarafından Çiygoz A.Z. işi boyunca toplaşuvğa diñleyici olaraq kelgen belli qırımtatar jurnalisti Zair Akadırovnı yaqalamağa ıntıldılar! Al-azırda Zairni hadimler ile ketmege mecbur eteler», – yazdı Kurbedinov Facebookta.

Avdokatnıñ malümatına köre, jurnalist vesiqalarnı kösterdi.

«Amma onı episi bir maşinağa oturtıp, ekstremizmge qarşılıq boyunca merkezge alıp ketecek oldılar, amma Zairni alıp ketmege çare tapalmayıp, onı Qırım Yuqarı mahkemesiniñ qarşısında politsiyanıñ memuriy binasına ozğardılar», – dey advokat.

Şimdi Akadırov ile bağlanmağa imkân yoq, telefonğa cevap bermey. Qırımnıñ uquq qouyıcı organları bunı izaatlamay.

Qırımnıñ Rusiye Yuqarı mahkemesi yanvar 15 künü Meclis reisiniñ muavini Ahtem Çiygoz, Mustafa Degermenci, Ali Asanovğa nisbeten «fevral 26 işi» boyunca qabaatnı seslendirecek.

Mustafa Degermenci, Ali Asanov ve Ahtem Çiygoz bir buçuq yıl evelsi fevral 26 künü Qırım parlamenti yanında Ukraina topraq bütünliginiñ tarafdarları ve «Russkoye yedinstvo» («Rusiye birligi») firqasınıñ faalleri arasında teşkil olunğan «kütleviу tertipsizliklerde» iştirak etüvleri içün qabaatlana.

XS
SM
MD
LG