Qırımtatar Mmlliy Meclisi reisiniñ muavini Ahtem Çiygoznıñ «fevral 26 işi» boyunca imayecisi Rusiye advokatı Nikolay Polozov dey ki, mezkür işte esas şaat Sergey Aksenovdır. Advokat onı Qırımda yanvar 15 künü keçirilecek mahkeme toplaşuvında körmege istey.
«Çiygoznıñ işi bonca esas şaat – Sergey Aksenov. Ümüt etem ki, onıñ sorğusında toplaşuvnı qapatmazlar, Savçenko işinde Plotnitskiyniñ sorğusında olğanı kibi», – yazdı Polozov twitterde.
Yaqında belli olğanı kibi, Rusiye apishanesinde bulunğan ukrain Nadejda Savçenkonıñ adliyecilerinden biri Çiygoznıñ «fevral 26 işi» boyunca imayecisi olacaq.
Qırımnıñ Rusiye Yuqarı mahkemesi yanvar 15 künü Meclis reisiniñ muavini Ahtem Çiygoz, Mustafa Degermenci, Ali Asanovğa nisbeten «fevral 26 işi» boyunca qabaatnı seslendirecek.
Mustafa Degermenci, Ali Asanov ve Ahtem Çiygoz bir buçuq yıl evelsi fevral 26 künü Qırım parlamenti yanında Ukraina topraq bütünliginiñ tarafdarları ve «Russkoye yedinstvo» («Rusiye birligi») firqasınıñ faalleri arasında teşkil olunğan «kütleviу tertipsizliklerde» iştirak etüvleri içün qabaatlana.
