Ukraina prezidenti Petro Poroşenko Qırımnıñ işğal etilmesi boyunca muzakerelerniñ yañı halqara şeklini kirsetmek zaruriyeti aqqında bildire. Yanvar 14 künü Poroşenko matbuat konferentsiyasında işbu muzakerelerge Ukrainanıñ Avropa birligi ve AQŞ şeriklerini celp etmege kerek olğanını qayd etti.
«Biz yarımadanıñ işğal etilmesi boyunca halqara mehanizmni meydanğa ketirmege teklif etermiz. Böyle mehanizmniñ başlanması içün Avropa birligi, AQŞ ve, belki de, Budapeşt memorandumınıñ aza memleketlerinden şeriklerimizniñ iştiraki ile «Jeneva plüs» şeklini tüşünem», – dedi Ukraina prezidenti.
Poroşenko şunı qayd etti ki, Donbass ve Qırımnıñ Ukrainağa qaytarılması kibi «qıyın meselelerni» «ilk evelâ siyasiy-diplomatik ve halqara-uquqiy yollarnen al etecekler».
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
