Çarşenbe künü, yanvar 13-de, Aqmescitte 16 yaşında Elvina Razakova ğayıp oldı. Çarşenbe künü saba evinden oquşqa ketti, amma bulunuv yeri alâ daa belgisiz.
Bu malümatnı Qırım.Aqiqatqa qıznıñ babası Abulaziz Razakov tasdiqladı.
Aytqanı kibi, öz başına qıdıruvları neticesiz oldı, şunıñ içün saba yanvar 14-de olar politsiyağa muracaat ettiler.
Tuvğanlarınıñ sözlerine köre, Elvina ile telefon vastasınen bağlanıp olamaylar, çarşenbe sabasından telefonğa cevap bermey.
Bunıñ ile bildirilgeni kibi, qız hicab ve uzun müsülman urbasına kiyingen.
Keçken afta Qırımda erkek Ernest Ablâzimov ğayıp oldı, 2015 senesi dekabrde Keriçte daa eki adam: Ruslan Ganiyev ve dostu Arlen Terehov ğayıp oldılar.
Qırım işğalinden soñ yarımadada bir qaç qırımtatarı belgisiz ğayıp oldı: Seyran Zinedinov (2014 senesi mayıs 30-da ğayıp oldı), İslâm Cepparov ve Cavdet İslâmov (2014 senesi sentâbr 27 künü), Eskender Apselâmov (2014 senesi oktâbr 3-de).
Qırım Taqiqat komiteti bir sıra cinaiy işni açtı, amma bu insanlarnıñ taqdiri aqqında alâ daa malümat yoq.
