Ukraina, mütenasip avale olmasa, 2014 senesinden berli Rusiye nezareti altında olğan Qırımğa elektrik energiyasını bermeycek, dedi jurnalistlerge yanvar 13 künü Ukraina energetika ve kömür sanayı naziri Vladimir Demçişin.
«Rusiye tarafı Ukraina şartları boyunca añlaşmanı imzalamağa razı degil, bizim siyasiy mevamımız ise evelden seslendirilgen edi – (eletkrik energiyasını – QA) berip olamaymız, sebep yoq. Şunıñ içün fiyat aqqında laf etmege acet yoq. Al-azırda anlaşma yoq, şunıñ içün bermeymiz», – dedi nazir.
O şunı da qayd etti ki, Kuban energetik köprü olğanına ve Rusiyeden ketirigen generatorlarğa baqmadan, Qırım yıl devamında energetik teminlevi ile problemlerni is etecek.
Qırımğa dekabr 30-dan qıtaiy Ukrainadan elektrik energiyası berilmey, Herson vilâyetinde elektrik yolağınıñ patlavı buña sebep olmalıdır. Al-azırda elektrik tiremesi tamirlengen, amma energetik muqaveleniñ toqtatılmasından sebep elektrikni bermeyler. Yarıq ile olğan problemlerden sebep bazı regionlarda qazan dairelerini söndüreler, insanlar çeşit qızdıruv aletlerinden faydalanmağa mecbur. Rusiye FVN Qırım idaresiniñ reberi Sergey Şahov aytqanı kibi, Qırım şimdi kerek olğan 1350 megavattan 931 MVt ala.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
