Qırım Rusiye prokurorı Natalya Poklonskaya dey ki, yarımada qamaçavından zarar endi 361 mln rubleni teşkil etti. Bu aqta o yanvar 13 künü jurnalistlerge bildirdi. Ses yazısı Krıminform saytında aşkâr etilgen.
«Bugün diversiya boyunca 361 million. Resmiy olaraq. Amma bu miqdar artacaq. (Cinaiy işniñ – QA) açılması vaqtında 70 mln edi», – dedi Poklonskaya.
«Qırım cumhuriyetiniñ Yuqarı mahkemesi cinaiy işni memnüniyet ile baqacaq. Qabaatlı şahısqa endi ceza qararı alınğan», – dep qoştı o.
2015 senesi dekabr 21-de Poklonskaya degeni kibi, Rusiye tarafından işğal etilgen Qırım ile memuriy sıñırnıñ qamaçavı boyunca aktsiyasınıñ idarecisi, iş adamı Lenur İslâmovnı diversiyada qabaatlaylar.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Qamaçav iştirakçileriniñ talapları arasında – siyasiy mabüslerniñ azat etilmesi, Qırımda insan aqlarına riayet etüv ve yarımadağa halqara eyyetlerniñ kirsetilmesi. Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene edi. Amma bu yeterli degil edi. Qırımğa dekabr 2 künü kelgen Rusiye prezidenti Vladimir Putin Kubanden Qırımğa energetik köpürniñ birinci yolağınıñ berilmesi tedbirinde iştirak etti.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
