Qırım ve Aqyar musulmanlarınıñ diniy idaresi İstanbul merkezinde teraktnı azırlağanlarnıñ areketlerini takbih ete, patlav neticesinde 10 insan elâk oldı, 15 – yaralandı, haber ete Qırım Müftiylikniñ matbuat hızmeti.
«Qırım müftisi hacı Emirali Ablayev cumhuriyet musulmanları adından elâk olğanlarnıñ ailelerine, türk hаlqına, Türkiye ükümeti ve Türkiye Cumhuriyetiniñ Din işleri boyunca idaresi ve onıñ reisi – professor, doktor Mehmed Görmezge taziyelerini bildire», – denile beyanatta.
Müftiylikte şunı qayd eteler ki, «qabaatsız insannıñ öldürüvi – islâmda bütün insanlıqnıñ ölümine teñ kelgen büyük günâhtır».
«Elâk olğanlarnıñ tuvğanları ve yaqınları, olğan qorqunçlı teraktnıñ deşetini duyğan bütün musulmanlar ile birlikte kederlenemiz», – dedi Qırım musulmanlarınıñ diniy yetekçisi Emirali Ablayev.
İstanbulda Sultanahmet rayonında yanvar 12 künü yüz bergen patlav neticesinde 10 insan elâk oldı, 15 – yaralandı.
Patlav vaqtında elâk olğan 10 insandan doquzı – Almaniya vatandaşı edi. Yanvar 12 künü Türkiye politsiyası «İslâm devleti» teşkilâtına alâqası olğanında qabaatlanğan bir qaç insannı yaqaladı. Şu teşkilâtlandıruvnıñ patlavğa alâqası bar olğanını tüşüneler. Bunıñ ile Antaliyada üç Rusiye vatandaşınıñ yaqalanuvı aqqında bildireler. Sebebi ögrenile.
