Qırımtatarlarnıñ milliy lideri Mustafa Cemilevniñ oğlu Hayser Astrahanniñ №10 apishanesinde yatmağa devam etecek. Rusiye onı Ukrainağa bermek talabını tekrar red etti.
Bunı Rusiyede mahküm etilgen Hayser Cemilevniñ adliyecisi Nikolay Polozov Twitterde bildirdi.
«Rusiye müvekkilim Hayser Cemilevniñ Ukrainağa teslim talabını tekrar red etti. Bundan soñra şartlı azat etüv qararını bekleycekmiz», – dep yazdı Polozov.
2015 senesi dekabr ayınıñ ortasında Astrahanniñ Sovet rayonı mahkemesine Hayser Cemilevni şartlı olaraq vaqtından evel azat etmek muracaatı berildi.
Rusiye Federatsiyasınıñ Yüksek mahkemesi Krasnodar ülkesiniñ mahkemesi Hayser Cemilevge bergen 5 yıl apis cezasını üç buçuq yılğa qadar qısqarttı. Aynı vaqıtta Kiyevniñ Dnepr mahkemesi 2015 senesi aprel ayında onı 3 yıl ve 8 ayğa qadar azatlıqtan marum qaldırdı.
Keçken sene iyül 10 künü İnsan aqları Avropa mahkemesi Hayser Cemilevni SİZOdan azat etmek qararını çıqardı. Rusiye bu qararğa emiyet bermedi
Hayser Cemilev 2013 senesi mayıs 27-de Bağçasaraydaki evinde yaqalanğan edi. O, babasınıñ silâsını alıp, qorantasınıñ tanışı 44 yaşında Fevzi Edemovnıñ öldürüvi ile qabaatlana. Qırım işğalinden soñ Rusiye taqiqat organları bu işni ğayrıdan taqiq etmege qarar aldı. Hayserni Aqmescit apishanesinden Krasnodar ülkesine alıp kettiler.
Keçken sene iyül 10 künü İnsan aqları Avropa mahkemesi Hayser Cemilevni SİZOdan azat etmek qararını çıqardı. Rusiye bu qararğa emiyet bermedi.
