Ukraina prezidenti Petro Poroşenko dey ki , Qırımnıñ işğаlden azat etilmesi boyunca meseleniñ al etüvini sozğalamağa mümkün degil.
Bunı o yanvar 12 künü Ukrainada çetel devletler elçileri ile körüşüvde ayttı, dep bildire devlet başınıñ matbuat hızmeti.
«Prezident Qırım meselesiniñ sozğalavı mümkün olmağanı aqqında bildirdi ve yarımadanıñ işğalden azat etilmesi içün halqara mehanizmniñ müimligini qayd etti», – denile beyanatta.
Poroşenko şunı da qayd etti ki, Ukraina «Minsk añlaşmalarınıñ yerine ketirilmesine sadıq qala».
«Rusiye Minskte bir qolu ile barışıq añlaşmalarını imzalağanda, ekincisinen – Debaltsevo ukrain şeerini qanğa battıra edi. Halqara basqı olmasa, Rusiye toqtalmaz. Basqı devam etmeli, Moskva cenk baltasını tam kömmegence ve qomşularınıñ mustaqilligini ürmet etmegence», – dedi Petro Poroşenko.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
Ukraina şarqında arbiy areketler 2014 senesi aprelden devam ete. Bu vaqıt içinde, BMT bildirüvine köre, anda bir 9000 insan elâk oldı.
