Qırımnıñ Yuqarı radası Qırım jurnalisti, «QARA DENIZ PRODUCTION» studiyası baş müdiriniñ muavini Lilâ Bucurovanıñ onıñ evinde 2015 senesi noyabr 2 künü tintüvni keçirgen Rusiye FSB hadimlerine qarşı davası boyunca şikâyet arizasını lâğu etti. Yuqarı mahkeme Aqmescitniñ Kiyev rayon mahkemesiniñ qararını qaldırdı.
Bundan evel, 2015 senesi noyabr ayında, mahkeme Bucurovanıñ evinde tintüvni keçirgen FSB hadimlerine nisbeten davanı lâğu etti. Buña sebep – taqiqat tedbiri keçirilgen yerde jurnalistke bulunmağa izin bermediler.
«Menim içün tesadüfiy bir şey olmadı. Öyle de tüşündim. Qırımda mahkeme FSB ile davalaşqan vatandaş tarafını alır dep tüşünmege kerekmey», – dedi Bucurova jurnalistlerge.
«Amma bu bir taraflama oyun olğanını añlayım, bu territoriyada aqlarnıñ qoruvı – bir taraflama oyun ve bu tarafqa tek küç olğanlar kete bile. Amma, ileride de davalaşacağımnı tüşünem», – dedi o.
Qırımnıñ uquq qouryıcı ve mahkeme organlarınıñ bu aqta izaatları şimdilik yoqtır.
Qırımda noyabr 2 künü ATR qırımtatar telekanalınıñ sabıq hadimleriniñ – Elzara İslâmova, Lilâ Bucurovanıñ evlerinde ve telekanal saibi Lenur İslâmovnıñ ana-babasınıñ ve Moskvadaki onıñ şahsiy evinde tintüvlerni keçirdiler. Bu sene mayıs ayında ATR sabıq baş müdiri Elzara İslâmova Lilâ Bucurova ile birlikte «QARA DEÑİZ PRODUCTION» mustaqil production studiyasını teşkil ettiler.
