Saba, yanvar 12-de, Keriç boğazından parom keçitiniñ işi kene toqtaldı. FVN Qırım idaresiniñ matbuat hızmeti bildirgeni kibi, paromlar ava şaraitlerinden sebep yürmey.
«Ava şaraitleriniñ eyileşüvine qadar aydavcalırğa Keriç parom keçiti tarafına barmamaq rica etile», – denile beyanatta.
Keçitte toplanğan maşina sayısı aqqında malümat yoq.
FVN Qırım idaresiniñ matbuat hızmeti bildirgeni kibi, gece keçit tumandan sebep bir 5 saat çalışmay edi. Amma yarı geceden soñ Keriç boğazından paromlarnıñ qatnavı ğayrıdan başlandı, deyler matbuat hızmetinde.
Keriç boğazından parom keçiti Rusiye tarafından işğal etilgen Qırımnı Rusiye Federatsiyasınıñ Krasnodar diyarı ile bağlağan yekâne naqliyat arteriyasıdır.
