Link açıqlığı

Uquq qoruyıcılar Qırımdan mülkni çıqarmaq yasağı ile bağlı meselelerni mahkemede çezmege tevsiye eteler


İşğal etilgen yarımadadan qıtaiy Ukrainağa şahsiy mülkni çıqarıp olamağan qırımlılar mahkemelerge muracaat etmeli, dedi Qırım.Aqiqat Radiosı efirinde uquq qoruyıcı Vissarion Aseyev.

Qırım sakinleri yarımadadan qıtaiy Ukrainağa şahsiy mülkniñ çıqarılması ile bağlı olğan problemlerge şikâyet etе. Qırımlalar bildirgeni kibi, memuriy sıñırda Ukraina devlet hızmetiniñ yasaqları sebebinden problemler meydanğa kele.

Bir qaç diñleyici Qırım.Aqiqat Radiosınıñ efirinde bu aqta öz ikâyeleri ile paylaştı.

Uquq qoruyıcı dey ki, qırımlılar Ukraina vatandaşları ola ve öz aqlarından faydalanmalı: «Aqlardan eñ müimi – şahsiy mülkiyetini istegine köre qullanmaq. Naqliyat, adı ne olsa da, atta tank, Ukraina vatandaşınıñ qanuniy mülki olsa, onıñ vastası ile serbest areket ete bile».

Aseyev aytqanı kibi, sıñır bekçileri, qanunğa köre, vatandaşlarğa qıtaiy Ukrainağa şahsiy mülkiyetniñ çıqarılmasına yazılı cevapnı bermeli. Amma böyle yasaqlarnı vatandaş aqlarınıñ bozuluvı dep saya.

«Sıñır bekçileri bir şey talap etkende, Ukraina vatandaşları bütün talap ve yasaqlarnıñ yazılı şeklini almalı, bu qadar. Bundan soñ uquq qoruyıcılarğa muracaat etmek mümkün, şu cümleden, Qırım uquq qoruyıcı gruppasına. Mahkeme yardımı ile bu meselelerni al etecekmiz. Olarnıñ çezüv yolları bar», – dedi Aseyev.

Ukraina Devlet sıñır hızmetinde Qırım.Aqiqatqa işbu vaziyetni kün devamında izaatlamağa söz berdiler.

2014 senesi Rusiye Qırımnı işğal etkeninden soñ qıtaiy Ukraina ve yarımada arasında memuriy, aqiqatta ise – kerçek sıñır peyda oldı. Qırım vaqtınca işğal etilgen territoriya olaraq sayıla.

XS
SM
MD
LG