Qırımtatar Wikipediası nevbetteki yıllığını qayd ete – 2008 senesi yanvar 12 – leyhanıñ resmiy Doğğan künüdir.
Leyha teşebbüsçisi qırımtatar tilini yahşı bilgen Moskva sakini Aleksandr Gorâinovdır. Bölükniñ maqaleleri II Qırımtatar Milliy Qurultayında qabul etilgen latin urufatında yazmağa qarar aldılar ve kelecek künü Wikipedianıñ yañı bölügi 500-den ziyade maqaleden ibaret edi.
«Wikimedia Ukraina» cemaat teşkilâtı öz blogunda qayd etkeni kibi, bu qırımtatar Wikipediası içün eñ büyük muvafaqiyet edi, ileride inkişaf suratı eksildi. Umumen, sekiz yıl devamına 4500 maqale yazıldı, çoqusı 2012 senesi dekabr ayından 2014 senesi mayıs ayına qadar çıqtı.
Teşkilâtta deyler ki, Wikipediya qırımtatar tiliniñ gençler arasında rağbetleştirüvi boyunca teşebbüslerni amelge keçirmege ve qırımtatar tilinde çıqacaq haber alanınıñ temelini qoymağa yardım eter.
2015 senesi dekabr ayında qırımtatar cemaatçılıq vekilleri ve Ukraina Haber siyaseti nazirligi işbirlik ve «Wikipediya» bütündünya ağında qırımtatarlar aqqında ukrain ve ingliz tillerinde malümatnıñ tarqatılacağı aqqında añlaştılar.
