Ukraina Baş prokuraturası yanında QMC prokuraturası Qırımda Ukraina halq deputatı, Ukraina prezidentiniñ qırımtatar halqınıñ işlerinden vekâletlisi Mustafa Cemilevniñ qadını Safinar Cemilevniñ reberliginde «Qırımtatar qadın-qızlar ligası» cemaat teşkilâtınıñ faaliyetine keder etüvi boyunca cinaiy işni açtı. Bu aqta yanvar 11 künü, bazarertesi, prokuraturanıñ matbuat hızmeti bildire.
«İşbu teşkilât 20 yıl devamında öksüz, esli başlı insanlarğa yardım ete, çeşit hayriye tedbirlerini keçire edi. Amma vaqtınca işğal etilgen Qırım yarımadasında qanunsız sürette teşkil etilgen organlar Ukraina qanuniyetini qaba sürette boza ve teşkilâtnıñ uzun vaqıt devamında Aqmescit merkezinde Gasprinskiy kitaphanesi binasında yerleşken ofisinden quvulması boyunca qanunsız areketlerini ete», – denile beyanatta.
Qırım Muhtar Cumhuriyeti ve Aqyar şeerinde Milliy politsiya baş idaresiniñ 2015 senesi dekabr 26 künü Ukraina CK 170 maddesinde olğan cinayet hasiyetleri boyunca cinaiy işni açtı.
«Qırımtatar qadın-qızlar ligası» cemaat teşkilâtını Qırımnıñ Rusiye akimiyeti Aqmescit merkezinde Gasprinskiy adına cumhuriyet kitaphanesi territoriyasında yerleşken ofisten quva.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
