Rusiye prezidenti Vladimir Putin Qırım sebebinden Rusiyege qarşı Ğarpnıñ cezalarını «aqılsız ve zararlı qarar» olaraq adladı. Aytqanı kibi, ğarbiy şeriklerniñ reaktsiyası «yañlış ve Ukraina destegine degil de, Rusiye imkânlarınıñ sıñırlavına yönelgen».
Bu aqta o yanvar 11 künü basılğan Bild alman gazetasına bergen intervyüde ayttı.
Rusiyeniñ Qırımnı dünya tarafından tanılmağan referеndum vastası ile öz territoriyasına qoşmaq qararnı Putin «demokratiya ve halq iradesi» dep adladı.
«Bilesiñizmi, Rusiye ealisi is ete ve olayatqan adiselerni em yürek, em aqıl ile añlay. Napoleon aytqan edi, adalet – yer yüzünde Allahnıñ aksi. Qırımnıñ Rusiyege qoşulması – adaletli qarar», – dedi Putin.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
