Link açıqlığı

Qırımnıñ Rusiye başı Sergey Aksenov aytqanı kibi, Qırımda noyabr soñunda energoqıtlığı sebebinden kirsetilgen fevqulâde vaziyet (FV) rejimi eñ azından 2016 senesi mayıs 1-ne qadar saqlanılacaq. Bu aqta o yanvar 7 künü FV aqibetleriniñ yoq etilmesi boyunca ştabnıñ toplaşuvında bildirdi, haber ete TASS.

«Ştab FV rejiminiñ soñuna qadar çalışa – mayıs 1-ne qadar, eñ azından. Er kes iş yerlerinde buluna», – dedi Aksenov memurlarğa.

Aytqanı kibi, yaqın vaqıtta elektrik energiyasını söndürüv cedvelleri tam tertipke ketirilmeli, qazan daireleri er vaqıt elektrik energiyası ile teminlenilmeli.

Yanvar 10-na qadar bütün belediyeler energoqıtlığı şaraitlerinde iş planını taqdim etmeli.

Qırımğa dekabr 30-dan qıtaiy Ukrainadan elektrik energiyası berilmey, Herson vilâyetinde elektrik yolağınıñ patlavı buña sebep olmalıdır. Al-azırda elektrik tiremesi tamirlengen, amma energetik muqaveleniñ toqtatılmasından sebep elektrikni bermeyler. Yarıq ile olğan problemlerden sebep bazı regionlarda qazan dairelerini söndüreler, insanlar çeşit qızdıruv aletlerinden faydalanmağa mecbur. Rusiye FVN Qırım idaresiniñ reberi Sergey Şahov aytqanı kibi, Qırım şimdi kerek olğan 1350 megavattan 931 MVt ala.

XS
SM
MD
LG