Coca-Cola Washington ofisiniñ başı Kate İrvin Qırım toprağı ile Rusiye haritasınıñ basılması içün resmiy sürette afu soradı. Mütenasip bildirüvni o ukrain diploamatları ile körüşüvinde etti, dep bildire AQŞ Ukraina elçihanesi.
«Kate İrvin Coca-Cola şirketi prezidentiniñ muavini Klayd Tagglnıñ AQŞda Ukraina elçisi Valeriy Çalıy adına işbu derc içün afu mektübini teslim etti. Dercniñ mündericesi musatqil agentlik tarafından Coca-Cola ile uyğunlaşuv olmadan azırlandı, amma şirket bu içün mesüliyetni özüne ala. Qayd etile ki, şirket bu aqta haberni alıp, birden dercni sildi», – haber ete elçihane matbuat hızmeti.
Kate İrvin körüşüvde şunı bildirdi ki, Coca-Cola şirketi Ukrainada bergi ödegen eñ büyük şirketlerden biri ola ve ukrain çarşısında işine devam etmege planlaştıra.
Saba, salı künü, yanvar 5-de, Coca-Cola şirketiniñ Rusiye temsilciligi Rusiye haritasınıñ bazı qısımlarsız derci içün afu soradı, şu sırada Kaliningrad vilâyeti, Kuril adaları, ve işğal etilgen Qırım.
İçtimaiy ağlarnıñ ukrain qullanıcıları bundan çorlandı, çoqusı Coca-Cola şirketiniñ mahsulatını satın almamaq çağırdı. Bundan soñ Coca-Cola bu haritanı öz «VKontakte» ağındaki saifseinden sildi.
Bu sebepten içtimaiy ağlarnıñ Qırım işğaline qol tutqan Rusiye qullanıcıları şirket ukrain tarafınıñ mevamına qol tutqanı içün çorlandı ve mahsulatqa Rusiyede boykot bildirdi.
Aynı şu künü Coca-Cola şirketiniñ ukrain temsilciligi Qırımnı Rusiye qısmı olaraq aks etken haritanıñ derci içün afu soradı.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
