Devlet işğal etilgen Qırım meselesiniñ rağbetli olması içün vatandaşlar ile işbirlikte bulunmalı. Bu aqta Qırım.Aqiqat Radiosı efirinde haber siyaseti naziriniñ keñeşçisi Emine Ceppar bildirdi.
«Menimce, bizim alımızda, devletimiz, demokratik devlet olaraq, mustaqil devlet olaraq endi-endi şekillene. Şunıñ içün vatandaşlar cemiyeti devlet ögüne muayyen meseleni aça, qamaçav bunı tasdiqladı…Qamaçav devletniñ areketsizligi boşluğını toldurdı. Bunıñ neticesinde biz Qırımnı tek Ukrainada degil, dünya boyunca kün tertibine qaytardıq», – qayd etti Ceppar.
Aynı zamanda ukrain naziriniñ muavini aytqanı kibi, Qırım vatandaşlıq qamaçavınıñ er angi ceeti dünya toplulığı tarafından alğışlanılmadı.
«Bu qamaçavnı nasıl qabul ettiler, bu başqa sual. Naqliyat qamaçavı, mal qamaçaı – er keske kelişe edi, amma energetika meselesi peyda olğanda, aqibetleri gumanitar ceetinden felâketli ola bilecegini añlağanda, uquq qoruyıcılar izaatlarnı talap etmege başladı», – dey Ceppar.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Qamaçav iştirakçileriniñ talapları arasında – siyasiy mabüslerniñ azat etilmesi, Qırımda insan aqlarına riayet etüv ve yarımadağa halqara eyyetlerniñ kirsetilmesi.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
