Qırım musulmanları müftisiniñ muavini Ayder İsmailov qırımtatarlarnıñ milliy lideri Mustafa Cemilevniñ qıtaiy Ukrainada QMDİ teşkil etmek teşebbüsini «boş laf» dep adladı.
Bu aqta Ayder İsmailovnıñ Qırım.Aqiqatqa bergen izaatında aytıla.
«Qırımtatar halqı Qırımda, öz Vatanında yaşay ve Qırım müftiyligi Qırım musulmanları ile birlikte edi ve olacaq. Qırım musulman halqı bizge bergen vazifelerimizni itibar ile yerine ketirmege tırışamız ve tek halqı öz saylağan müftisine qıymet kese bile. Qalğanı – boş laf. Olarğa diqqat ayrımağa ya da ciddiy izaat bermege kerekmey», – dep bildirdi o Qırım musulmanları müftisiniñ mevamını.
O siyaset ve dinni qarıştırmamağa çağırdı.
«Siyasetçiler dinni öz maqsatlarında qullanmasın. Allah olarnıñ tarafında olmaycaq!» – dey İsmailov.
Qıtaiy Ukrainada Qırım Musulmanları Diniy İdaresini teşkil etecekler, baş ofisi Kiyevde olacaq. Bu aqta Ukraina prezidentiniñ qırımtatar halqınıñ işlerinden vekâletlisi, Ukraina halq deputatı Mustafa Cemilev QHA haber agentligine bildirdi. Cemilevniñ sözlerine köre, Qırım Müftiyligi şimdi işğalcige boysunğan.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
