Link açıqlığı

Ukraina prezidenti Petro Poroşenko Qırımnıñ Rusiye akimiyeti tarafından apiste tutılğan Meclis reisiniñ başı Ahtem Çiygoznı Yañı yıl ile hayırladı ve oña «ruhiy küç ve cesürlik» tiledi.

Devlet başınıñ hayırlavını Facebook saifesinde Ukraina prezidentiniñ qırımtatarlarnıñ işlerinden vekâletlisi Mustafa Cemilev aşkâr etti.

«Sizge sağlıq, ruhiy küç ve cesürlik tileyim. Yañı yıl epimizni adalet ve eyilikniñ yeñecek küçüne işanç ile toldursın. Eminim, ukrainler ve qırımtatarlar mıtlaqa yekâne avropalı memlekette birlikte yaşaycaq», – qayd etti Petro Poroşenko.

Cemilev şunı da qayd etti ki, «bu tilekler bu ağır vaqıtta bütün qırımtatarlar içün müim».

Mustafa Degermenci, Ali Asanov ve Ahtem Çiygoz bir buçuq yıl evelsi fevral 26 künü Qırım parlamenti yanında Ukraina topraq bütünliginiñ tarafdarları ve «Russkoye yedinstvo» («Rusiye birligi») firqasınıñ faalleri arasında teşkil olunğan «kütleviу tertipsizliklerde» iştirak etüvleri içün qabaatlana.

Qırımtatar Milliy Meclisi reisiniñ birinci muavini Ahtem Çiygoz, Mustafa Degermenci, Ali Asanov, Arsen Yunusov ve Eskender Emirvaliyevge nisbeten nevbetteki mahkeme toplaşuvları 2016 senesi yanvar 15-de keçirilecek.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.

XS
SM
MD
LG