Yanvar 5 künü Qırım Musulmanları Diniy İdaresinde keçirilgen rayon imamları ve diniy cemiyetler reisleriniñ toplaşuvında Ukrainada areket etken bazı vatandaşlarnıñ Qırım musulmanlarını bölmege ıntıluvları ile bağlı qasevetini bildirdiler. Bu aqta QMDİ matbuat hızmeti bildire.
Aytılğanı kibi, qırımtatarlarnı Vatanını terk etmek, Qırımda sulh ve stabillik içün telükeli olğan areketlerde iştirak etmege çağıralar.
«Musulman diniy hızmetçileri şunı hatırlattılar ki, qırımtatar halqı daima barışıqsever edi», – denile beyanatta.
Şunı da qayd eteler ki, diniy hızmetçilerniñ sözlerine köre, Qırımnıñ çeşit rayonlarında diniy vaziyet stabildir.
Rayonlarnıñ baş imamları ve diniy cemiyetler reisleriniñ er aylıq toplaşuvı er yañı aynıñ başında keçirile. Şu toplaşuvda 2016 senesine iş planı, yañı diniy cemiyetlerniñ qayd etüv meseleleri, ibadet evleri ve camilerniñ resmiyleştirüvi, Qırım köylerinde yañı camilerniñ qurucılığı muzakere etildi.
Qıtaiy Ukrainada Qırım Musulmanları Diniy İdaresini teşkil etecekler, baş ofisi Kiyevde olacaq. Bu aqta Ukraina prezidentiniñ qırımtatar halqınıñ işlerinden vekâletlisi, Ukraina halq deputatı Mustafa Cemilev QHA haber agentligine bildirdi. Cemilevniñ sözlerine köre, Qırım Müftiyligi şimdi işğalcige boysunğan.
