Link açıqlığı

Keriçte Putin ile olğan graffiti yerinde: «Sabır etiñ, insanlar, tezden yaz» yazısı peyda oldı


Keriç merkezinde şeer yalısı yanındaki eski kinoteatr divarında «Sabır etiñ, insanlar, tezden yaz» yazısı peyda oldı, haber ete Qırım.Aqiqat mühbiri.

Yazı qave renki boya ile yapılğan, mında evel Rusiye prezidenti Vladimir Putiniñ büyük süreti tasvir etilgen edi, amma belgisiz şahıslar tarafından üstüne pis sözler yazılğanından soñ, kommunal hızmetniñ hadimleri onı boyalap qoydılar.

Soñ vaqıtları Keriçte, bütün Qırımda olğanı kibi, ava arareti sıfırdan aşağı on ve ziyade derecege qadar eksildi.

FİN şeerde qızdıruv noqtalarını açtı, biri – Deñiz vokzalı yanında. Mında isinmek ve sıcaq çay içmege mümkün.

Bunıñ ile şeerde alâ daa energetik teminlevi ile problemler bar. Keriçke yarıq cedvel boyunca berile ve künde bir qaç kere söndürile.

Qırımğa dekabr 30-dan qıtaiy Ukrainadan elektrik energiyası berilmey, Herson vilâyetinde elektrik yolağınıñ patlavı buña sebep olmalıdır. Al-azırda elektrik tiremesi tamirlengen, amma energetik muqaveleniñ toqtatılmasından sebep elektrikni bermeyler. Yarıq ile olğan problemlerden sebep bazı regionlarda qazan dairelerini söndüreler, insanlar çeşit qızdıruv aletlerinden faydalanmağa mecbur. Rusiye FİN Qırım idaresiniñ reberi Sergey Şahov aytqanı kibi, Qırım şimdi kerek olğan 1350 megavattan 931 MVt ala.

XS
SM
MD
LG