Qırımnıñ Rusiye naqliyat nazirligi naqliyatnıñ marşrutlarğa çıquvı cedvelleriniñ bozuluvı sebebeinden naqliyat şirketleri ile yolcularnıñ taşuvına añlaşmalarnı lâğu etti.
Bu aqta nazirlik reisiniñ muavini Gennadiy Raskeviç yanvar 4 künü fevqulâde vaziyetke qarşılıq boyunca ştabnıñ toplaşuvında bildirdi.
Qırım Rusiye ükümetiniñ matbuat hızmeti bildirgeni kibi, bu sebepten Qırım Rusiye akimiyetiniñ başı Sergey Aksenov Qırım naqliyat nazirligine işbu taşıyıcılarnı yolcularnıñ taşuvına keçirilecek yarışlarğa qabul etmemek avale etti.
Yaqında fevqulâde vaziyetke qarşılıq boyunca ştabnıñ toplaşuvında Qırım Rusiye akimiyetiniñ başı Sergey Aksenov «cemaat naqliyatınıñ işi ile bağlı meseleni al etmege emir etti».
Aqmescitte yıl başından şeer boyunca cemaat naqliyatı yardımı ile areket etmege qıyın oldı, çünki o yürmey. Problemler dekabr 31 künü aqşam başlandı, Yılbaş arfesinde. Taksi çağırmağa imkânsız edi. İnsanlar cayav ketmege mecbur edi.
Aqmescitte elektrik teminlevi ile olğan problemlerden sebep trolleybuslar toqtaldı. Aqyarda trolleybuslarnı avtobuslarğa deñiştirseler, mında öyle bir şey yoq.
Qırımğa dekabr 30-dan qıtaiy Ukrainadan elektrik energiyası berilmey, Herson vilâyetinde elektrik yolağınıñ patlavı buña sebep olmalıdır. Al-azırda elektrik tiremesi tamirlengen, amma energetik muqaveleniñ toqtatılmasından sebep elektrikni bermeyler. Yarıq ile olğan problemlerden sebep bazı regionlarda qazan dairelerini söndüreler, insanlar çeşit qızdıruv aletlerinden faydalanmağa mecbur.
Rusiye FİN Qırım idaresiniñ reberi Sergey Şahov aytqanı kibi, Qırım şimdi kerek olğan 1350 megavattan 931 MVt ala.
