Qırımda yarımdada idare etken bütün teşkilâtlarnı teşkerecekler. Mütenasip avaleni Qırımnıñ Rusiye başı Sergey Aksenov yanvar 4 künü fevqulâde vaziyetke qarşılıq boyunca ştabnıñ toplaşuvında bildirdi, haber ete Qırımnıñ Rusiye ükümetiniñ matbuat hızmeti.
«Prokuraturağa bütün idare etken şirketler, ilk nevbette memuriyet başları ve sakinler tarafından şikâyetlengen şirketler boyunca muracaatnı azırlamaq, maliye-hocalıq faaliyetiniñ teşkerüvini keçirmek. Er kesni «ufaq elekten» keçirmek – bugün cumhuriyet prokuraturasına böyle muracaat olacaq», – qayd etti Aksenov.
Qırımnıñ Rusiye başı Sergey Aksenov qazan dairelerini elektrik energiyasından söndürmege yasaq etti ve mesken evlerniñ qızdıruvı içün mesuliyetli olğanlarnı cinaiy işler ile qorquzdı.
Qırımğa dekabr 30-dan qıtaiy Ukrainadan elektrik energiyası berilmey, Herson vilâyetinde elektrik yolağınıñ patlavı buña sebep olmalıdır. Al-azırda elektrik tiremesi tamirlengen, amma energetik muqaveleniñ toqtatılmasından sebep elektrikni bermeyler. Yarıq ile olğan problemlerden sebep bazı regionlarda qazan dairelerini söndüreler, insanlar çeşit qızdıruv aletlerinden faydalanmağa mecbur.
Rusiye FİN Qırım idaresiniñ reberi Sergey Şahov aytqanı kibi, Qırım şimdi kerek olğan 1350 megavattan 931 MVt ala.
