Elektrik energiyasınıñ berüvi qısqartılğanından sebep Aqmeçit qasabasında Revolütsiya soqağı boyunca yerleşken evlerniñ bir qısmı ve Tatar Çağaltay köyü «belgisiz müddetke» ışıqsız qaldı. Bu aqta Qırımnıñ Rusiye ükümetiniñ matbuat hızmeti bildire.
Bildirilgeni kibi, buña sebep istimalcılar tarafından elektrik energiyasını qullanuvınıñ artması ola bile.
«RES reberiniñ malümatına köre, eali tarafından elektrik energiyasınıñ qullanuvı artmasından sebep sıñırlavlar belgilendi, bunıñ neticesinde Aqmeçit qasabası Revolütsiya soqağında yerleşken evlerge, bağça birliklerine ve Tatar Çağaltay köyüne elektrik energiyasınıñ berilmesi toqtatıla», – denile beyanatta.
Qırımğa dekabr 30-dan qıtaiy Ukrainadan elektrik energiyası berilmey, Herson vilâyetinde elektrik yolağınıñ patlavı buña sebep olmalıdır. Al-azırda elektrik tiremesi tamirlengen, amma energetik muqaveleniñ toqtatılmasından sebep elektrikni bermeyler. Yarıq ile olğan problemlerden sebep bazı regionlarda qazan dairelerini söndüreler, insanlar çeşit qızdıruv aletlerinden faydalanmağa mecbur.
Rusiye FİN Qırım idaresiniñ reberi Sergey Şahov aytqanı kibi, Qırım şimdi kerek olğan 1350 megavattan 931 MVt ala.
