Bazartesi künü, yanvar 4-de, Sudaqta çoq qatlı ev yandı, sakinlerini tahliye ettiler. Bu aqta Rusiye Fevqulâde vaziyetler nazirliginiñ Qırım idaresi bildire.
«Yanğın 24 daireden ibaret olğan üç qatlı evniñ üçünci qatında yüz berdi, mında 39 insan yaşay edi», – denile beyanatta.
Yanğın meydanlığı 200 metre kare. Qurban ve zarar körgenler yoq.
Yanğın sebebi yanğınnıñ tam söndürilmesinden soñ belgilenecek. Al azırda yerli akimiyet ev sakinlerini Sudaqnıñ istiraat evleriniñ birine yerleştirecektir.
Qırımğa dekabr 30-dan qıtaiy Ukrainadan elektrik energiyası berilmey, Herson vilâyetinde elektrik yolağınıñ patlavı buña sebep olmalıdır. Al-azırda elektrik tiremesi tamirlengen, amma energetik muqaveleniñ toqtatılmasından sebep elektrikni bermeyler. Yarıq ile olğan problemlerden sebep bazı regionlarda qazan dairelerini söndüreler, insanlar çeşit qızdıruv aletlerinden faydalanmağa mecbur.
Rusiye FİN Qırım idaresiniñ reberi Sergey Şahov aytqanı kibi, Qırım şimdi kerek olğan 1350 megavattan 931 MVt ala.
