Siyasetçi ve tarihçılarnıñ Aqyar – «rus şeeri», Qırım ise – «asıl rus toprağı» olğanı aqqında bildirüvleri – efsanedir. Bu aqta Qırım.Aqiqat Radiosınıñ saba efirinde Qırım tarihçısı, Milliy hatıra ukrain institutınıñ hadimi Sergey Gromenko ayttı.
«Ruslar Qırım ealisiniñ büyük qısmını tek 1917 senesi teşkil etmege başladı. Bundan evel azlıq ediler. 18 – 19 asırnıñ başında Qırım ealisiniñ bir 5% ruslar teşkil etken edi… Bu da qırımtatarlarnıñ icreti ve merkeziy akimiyetniñ siyaseti neticesinde ruslar ealiniñ büyük bir qısmını teşkil ete edi. Qırım iç bir vaqıt rus degil edi. Diger devletten, daa doğrusı Qırım hanlığından tutıp alınğan vilâyet bar», – dedi o.
Tarihçınıñ aytqanı kibi, Qırım Rusiye terkibinde 200 yıl evelsi olğan edi. Şunıñ içün Qırımda iç bir zaman slav çoqluğı yoq edi – ne qadimiy zamanda, ne orta asırlarda.
«1783 senesinden 1954 senesine qadar 171 yıl keçti, 1918 senesi, 1941 ve 1944 senesi alman işğali devirlerini saymasaq. Qırım üç biñ yıllıq tarihında rus Qırım – beş buçuq fayızdır. Qırım er vaqıt Rusiyege ait olğanı aqqında aytmaq içün bu pek az», – dedi Gromenko.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
