ATR qırımtatar telekanalı ve «15 minut» saytı Qırım sakinlerini 2016 senesini Kiyev vaqtı boyunca qarşılamağa çağıra.
«15 minut» saytı bildirgeni kibi, 2015 senesi «qırımtatarlar ve Qırım içün» zor edi.
«Bu vaqıt içinde qırımtatarlarnıñ taqdirine çoq adaletsiz ve saçma sınav tüşti. Alâ daa siyasiy mabüsler apiste qala, faallerge basqı etile, ayırı, tintüvler devam ete, Qırımda ATR ve Lâle telekanalları, Meydan radiosı qapatıldı, qırımtatar gazetalarından çoqusı qapatıla bile. Qırımda qorqu müiti duyula. Buña baqmadan, serbestlik yüreklerimizde yaşay», – denile beyanatta.
«ATR telekanalınıñ taqımları ve «15 minut» saytı itibar ve şerefniñ qıymetini bilgen insanlarnı Yañı 2016 senesini Kiyev vaqtı boyunca qarşılamağa çağıra – azat Ukrainada qayd etilgeni kibi: prezidentniñ nutqu, Ukraina gimni, salüt ve sarı-mavı narat oyuncaqları ile», – dep çağıralar «15 minut» saytında.
Dekabr 16 künü Qırımda işiniñ toqtatılması aqqında ilân etken ATR media-holdinginiñ «15 minut» haber saytı Kiyevden işine devam etti. «15 minut» saytınıñ hadimleri «yap-yañı internet-leyhasınıñ meydanğa ketirilmesi üzerinde çalışmağa» niyetini bildirdi.
2015 senesi aprel 1-den dünyada yekâne ATR qırımtatar telekanalı, «Lâle» bala telekanalı, «Meydan» radiosı Roskomnadzor litsenziyasını alalmayıp, işğal etilgen Qırımda yayınlavını toqtatmaq mecbur oldı. İyün 17-den ATR ve «Lâle» Kiyevden yayınlavına devam etti, «Meydan» internette çalışmağa başladı.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
