Rusiye tarafını tutqan «Qırım» qırımtatar areketi BMT baş kâtibi Pan Gi Munğa muracaat etti ve eki ay devam etken yarımada qamaçavına seslenip, elektrik yolaqları patlavınıñ mustaqil halqara taqiqatını keçirmege çağırdı, dep bildire TASS Rusiye agentligi.
Bunıñ ile Qırım Rusiye parlamentiniñ spiker muavini Remzi İlyasovnıñ tarafından imzalanılğan vesiqada Pan Gi Munnı ukrain akimiyetinden terrorizm ile küreşte halqara mecburiyetlerine riayet etilmesini talap etmege çağıralar.
BMT yanındaki Rusiyeniñ daimiy temsilciliginde bildirilgeni kibi, mektüpni salı künü, dekabr 29-da, BMT kâtibiyetine berdiler. Vesiqada İlyasov Qırım qamaçavınıñ siyaseti «keñ tanılğan ümde ve halqara uquqnıñ qaidelerini qaba sürette bozğanını, Ukraina akimiyeti tarafından insannıñ sağlıq, tasil, emek, medeniyet aqları ve diger iqtisadiy, içtimaiy ve medeniy aqlarınıñ bozuluvını aks etkenini» qayd ete.
İlyasovnıñ sözlerine köre, energetik qamaçavı maqsadı ile yapılğan elektrik tiremeleriniñ patlavı kibi «terroristik vaqialarnıñ sırası» «bunı tasdiqlay ve insaniyet medeniyetiniñ qaidelerine, terrorizm ile küreşte dünya toplulığına bir çağıruvdır».
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Qamaçav iştirakçileriniñ talapları arasında – siyasiy mabüslerniñ azat etilmesi, Qırımda insan aqlarına riayet etüv ve yarımadağa halqara eyyetlerniñ kirsetilmesi.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
