Qırım qamaçavı boyunca aktsiyanıñ şekli deñişir, iştirakçileriniñ sayısı azlaşır. Bu aqta qamaçavnıñ teşebbüsçilerinden biri, Qırımtatar Milliy Meclisiniñ reisi Refat Çubarov dekabr 30 künü matbuat konferentsiyasında bildirdi.
«Şimdi «Qırımnıñ vatandaşlıq qamaçavı» aktsiyasınıñ şeklini deñiştirecekmiz ve insanlarımız, olduqça az miqdarda, gümrükçi, sıñır bekçileriniñ yanında olacaqlar. Akimiyet qararlarınıñ yerine ketirilmesini nezaret etecekler, elastı olmasın, dep», – dedi Çubarov, dep bildire Qırım.Aqiqat mühbiri.
O şunı hatırlattı ki, qamaçav iştirakçileri «özüne alğan» vazifelerniñ emiyeti endi yoq.
Çubarov qamaçav teşebbüsçilerine nisbeten uquq qoruyıcılarnıñ yüzlevini de izaatladı. Meclis reisiniñ başı aytqanı kibi, aktsiya teşebbüsçileri yekâne duşmanğa qarşı çıqa – «Ukrainağa nisbeten tecavuz olğan Rusiye devleti. Ve duşmanımız olğan insannıñ soy adı bar. Rusiye Federatsiyasınıñ prezidenti, Putin».
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Qamaçav iştirakçileriniñ talapları arasında – siyasiy mabüslerniñ azat etilmesi, Qırımda insan aqlarına riayet etüv ve yarımadağa halqara eyyetlerniñ kirsetilmesi.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
