Qırımnıñ Rusiye prokuraturasınıñ başı Natalya Poklonskaya dey ki, olarğa yarımada qamaçavı boyunca iç bir şikâyet kelmegen edi. Bu aqta o «TASS» Rusiye haber agentligine bildirdi.
«Bizde «erzaq qamaçavı» boyunca qırımlılardan iç bir ariza, iç bir şikâyet yoq edi, şunıñ içün mında nasıldır bir qararlarnıñ almaq kerekligini körmeyim. Bir kimsege zarar ketirilmedi – ne şirket, ne vatandaşlardan iç bir ariza yoq», – dedi o.
Poklonskaya şunı hatırlattı ki, onıñ fikrine köre, Herson vilâyetiniñ sakinleri zarar kördi. «Olar muayyen zararnı körgenler. Qırımğa ise er şey Krasnodar diyarından Keriç keçiti vastasınen ketirile edi ve ketirile», – dedi Poklonskaya.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Qamaçav iştirakçileriniñ talapları arasında – siyasiy mabüslerniñ azat etilmesi, Qırımda insan aqlarına riayet etüv ve yarımadağa halqara eyyetlerniñ kirsetilmesi.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
