Link açıqlığı

Qırımnıñ işğalden azat etilmesi boyunca muzakereler içün ayrı halqara şekil kerek – Çubarov


Qırımnıñ işğalden azat etilmesinı ayrı halqara meydançığında muzakere etmek kerek, dep tüşüne Qırımtatar Milliy Meclisiniñ reisi Refat Çubarov. Bu aqta o dekabr 30 künü Kiyevde matbuat konferentsiyası devamında bildirdi, haber ete Qırım.Aqiqat.

«Qırımnı qaytarılması ile bağlı diger adımlarğa kelsek, sanktsiyalarnıñ saqlanuvı ve birleşüvinden ğayrı, bizimce, ayrı meydançıq teşkil etilmeli, halqara, Qırımnıñ işğalden azat etilmesi ile bağlı meselelerniñ muzakeresi içün», – dedi o.

Çubarovnıñ fikrine köre, şimdi tek cemaat ve devlet olmağan teşkilâtlarnıñ ğayreti yeterli degil. «Menimce, vaqıt keldi, bu aq endi devletke keçe», – qayd etti Meclis reisi.

O kene şunı hatırlattı ki, «Qırım meselesi» Minsk añlaşmalarınıñ qısmı olmamalı ve ukrain akimiyetini QMC işğal etüvi ile bağlı meselege diqqat etmege çağırdı.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG