Qırımnıñ Rusiye prokurorı Natalya Poklonskaya dey ki, «fevral 26 işi» boyunca yaqalanğan Qırımtatar Milliy Meclisi reisiniñ muavini Ahtem Çiygozğa «ciddiy ükümniñ» çıqıralmasını talap etecek.
Bu aqta o «TASS» Rusiye haber agentligine bildirdi.
«Teşkilâtçılardan birisi – Ahtem Çiygoznıñ işi boyunca birinci mahkeme toplaşuvı da endi keçti. O ve onıñ tarafdarları apiste buluna. Mahkeme toplaşuvları yanvarniñ 15-den keçirilecek. Teşkilâtçılar olğanından sebep qattı ükümni talap etecekmiz. Mahkemeden evel taqiqat devamında olarnıñ yapqan areketleri şu insanlar añlamay ve hayal etkenini, mahsus bonuslarını qazanğanını köremiz. Amma bu arqadaşlar apiste yatacaq, ve bayağı», – dey Poklonskaya.
Aqmescitte «fevral 26 işi» boyunca bazarertesi künü birden eki mahkeme toplaşuvı keçti – Qırımnıñ Yuqarı Mahkemesi ve Aqmescitniñ Merkeziy rayon mahkemesinde. Yuqarı Mahkeme binası yanında onlarnen insan toplandı, amma toplaşuv salonına tek bir qaç insan kirip oldı, çoqusı, şu cümleden, mamahkümlerniñ – Mustafa Degermenci, Ali Asanov, Arsen Yunusov ve Eskender Emirvaliyevniñ tuvğanları kiremedi.
Rusiye taqiqatçıları olarnı 2014 senesi fevral 26-da Qırım parlamenti binası yanında Ukraina topraq bütünliginiñ tarafdarları ve «Rus birligi» firqasınıñ faalleri iştirak etken çoq biñli mitingde yüz bergen «kütleviy çatışmalarda» iştirak etüv ile qabaatlaylar. Qırımda «fevral 26 işi» boyunca qabaatlanğan Talât Yunusovğa dekabr 28 künü üküm çıqarıldı, mazun fevral 26 künü kütleviy çatışmalarda iştirak etkeni içün 3,5 şartlı apis cezasına maküm etilgen. Bu sene oktâbr ayında ATR qırımtatar telekanalınıñ sabıq operatorı Eskender Nebiyev eki yıllıq şartlı apis cezasına maküm etildi.
2016 senesi yanvar 15-de keçirilecek toplaşuvda Qırım prokuraturası iş iştirakçilerine qabaatını ve mevamını bildirecek.
Mazunlarnıñ imayesi bir qaç cılttan ibaret olğan iş malümatlarını ögrene.
