Link açıqlığı

Çubarov: ukrain qanuniyetine baqmadan , Qırımda yanvar 1-ne qadar elektrik energiyası söndürilmese – demek, bizni «teslim ettiler»


Qırımtatar Milliy Meclisinde Rusiye tarafından işğal etilgen Qırımğa qıtaiy Ukrainadan elektrik energiyasınıñ berilmesi aqqında muqavele 2015 senesi dekabr 31-ne qadar imzalanılğanı aqqında hatırlatalar ve ukrain akimiyeti yañı añlaşmanıñ imzalanılacağı ya da imzalanılmaycağı ile bağlı meseleni al etecegini bekleyler.

Bu aqta dekabr 30 künü Kiyevde matbuat konferentsiyası devamında Meclis reisi Refat Çubarov bildirdi, haber ete Qırım.Aqiqat.

«Yanvar birinde turıp, Qırım elektrik energiyasını alğanını bilsek ve bizge Ukraina qanuniyetine köre imzalanılğan vesiqanı köstermeseler, demek, bizni teslim ettiler. Ümüt etem ki, yarın ya da o birisi kün nasıldır bir cevaplarnı alırmız. Ya da Qırımnıñ «teslimi» ileride de devam etecek», – dedi o.

Çubarov şunı da qayd etti ki, yañı añlaşma imzalanılsa, Qırım «vaqtınca Rusiye Federatsiyası tarafından işğal etilgen Qırım Muhtar Cumhuriyeti» olaraq qayd etilecek. «Öyle yazsalar, öz 220 megavattnı alsınlar», – qayd etti meclis reisi.

Evel Qırımnı teminlegen elektrik yolaqlarınnı tamirine keder etken qamaçav iştirakçileriniñ areketleri aqqında sualge cevap bergen Çubarov bu tek qırımtatarlarğa degil, bütün ukrain toplulığına ait bir mesele olğanını ayttı.

«Bütün Ukraina ve bütün ukrain cemiyeti ileride qırımtatarlarnıñ areketlerini beklese, Qırımğa, Ukraina qanuniyetine baqmadan, elektrik energiyası berilgende, demek bu cemiyette yañlış bir şeyler bardır», – dedi Refat Çubarov.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Qamaçav iştirakçileriniñ talapları arasında – siyasiy mabüslerniñ azat etilmesi, Qırımda insan aqlarına riayet etüv ve yarımadağa halqara eyyetlerniñ kirsetilmesi.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG