Link açıqlığı

Saatnıñ esas haberi

Qırım qamaçavınıñ faalleri yılbaş gecesi Rusiye sıñırcılarını «taqattan tüşürmezler» – İslâmov


Qırım qamaçavı boyunca vatandaşlıq qamaçavınıñ iştirakçileri yılbaş gecesini yarımada ile memuriy sıñırda keçirip, «Rusiye sıñırcılarını taqattan tüşürmezler».

Bu aqta Qırım.Aqiqatqa aktsiya ştabınıñ başı Lenur İslâmov bildirdi.

«Yañı yılnı memuriy sıñırda faaller ile qarşılaycaqmız. Olar menim içün qoranta kibi», – dedi o.

Ştabnıñ başı aytqanı kibi, yılbaş gecesi faaller «Rusiye sıñırcılarına Qırım – Ukraina olğanını hatırlatacaq».

«Olarnı taqattan tüşürmeycekmiz. Qırımğa kelecegimizni olarğa er kün hatırlatamız, anda çoqqa qalacaqlarını tüşünmesinler», – dey İslâmov.

Qırım regionarında bayram künleri qoşma patrullerniñ yardımı ile qoruvnı arttıralar.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Qamaçav iştirakçileriniñ talapları arasında – siyasiy mabüslerniñ azat etilmesi, Qırımda insan aqlarına riayet etüv ve yarımadağa halqara eyyetlerniñ kirsetilmesi.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG