2014 senesi fevral 26 künü keçirilgen miting devamında elâk olğan qırımlı Valentina Kоrnevanıñ aqayı aytqanı kibi, «fevral 26 işi» boyunca qabaatlanğan qırımtatarlar onıñ ölüminde qabaatlı degil, dep bildire «15 minut» saytı.
Qırım sakini Vladimir yaqında Aqmescitte «fevral 26 işi» boyunca keçirilgen mahkeme toplaşuvından evel neşir mühbirine degeni kibi, apayınıñ ölüminden soñ «aselet öldürüv» maddesi boyunca ayrı cinaiy iş açıldı, amma taqiqat «pek yaramay» alıp barıla edi.
«15 minut» saytı Vladimirniñ sözlerini bildirgenine binayen, taqiqat devamında bir 25-30 şaat soraştırıldı, iş malümatları yeterli degil edi. Birazdan onı Rusiye Taqiqat komitetininiñ Qırım taqiqat idaresine çağırdılar, mında taqiqatçı oña taqiqat «fevral 26 işi» çerçivesinde keçirilecegini bildirdi.
«Apaynıñ aqiqiy qatilleri aqqında nasıldır bir malümatnı elde etmek ıntıluvları neticesiz oldı. «Fevral 26 işi» işitrakçilerinden iç birisini taqiqat öldürüvde qabaatlamay – aselet ya da muqaytsızlıqtan. Şunıñ içün Vladimir emin, böylece apayınıñ ölümi aqqında işni qapatmaq, qabaatsız insanlarnı ise qabaatlamağa isteyler», – denile beyanatta.
2014 senesi fevral 26 künü qırımlı mitingde buluna edi. Aytqanı kibi, apayı ile şeerde keze edi ve ne olayatqanını ögrenmek içün toqtadılar.
«O, qadınını Qırım parlamenti binası qarşısında qaldırdı («Rusiye birliginiñ tarafdarları mitingni keçirgen yerde) ve narazıcılarnıñ sürüsine yaqınlaşmamağa rica etti, özü ise esas tedbirlerge yaqın ketti. Vladimir dey ki, «Russkoye yedinstvo»ğa şübeli körünüşi olğan yaşlar ile eki avtobus keldi. Birazdan olar Karl Marks soqağı boyunca yerleşken tibbiy oquv yurtu tarafına qaça edi, aynı o vaqıt olardan birisi apayını öldürdi, emindir Vladimir. Nasıldır bir qaynaqlarğa esaslanıp, 17 ve 20 yaşında eki genç olğanını tüşüne», – yaza neşir.
Aqmescitte «fevral 26 işi» boyunca bazarertesi künü birden eki mahkeme toplaşuvı keçti – Qırımnıñ Yuqarı Mahkemesi ve Aqmescitniñ Merkeziy rayon mahkemesinde. Yuqarı Mahkeme binası yanında onlarnen insan toplandı, amma toplaşuv salonına tek bir qaç insan kirip oldı, çoqusı, şu cümleden, mamahkümlerniñ – Mustafa Degermenci, Ali Asanov, Arsen Yunusov ve Eskender Emirvaliyevniñ tuvğanları kiremedi.
Rusiye taqiqatçıları olarnı 2014 senesi fevral 26-da Qırım parlamenti binası yanında Ukraina topraq bütünliginiñ tarafdarları ve «Rus birligi» firqasınıñ faalleri iştirak etken çoq biñli mitingde yüz bergen «kütleviy çatışmalarda» iştirak etüv ile qabaatlaylar.
Qırımda «fevral 26 işi» boyunca qabaatlanğan Talât Yunusovğa dekabr 28 künü üküm çıqarıldı. Qırım.Aqiqatqa adliyeci Cemil Temişev aytqanı kibi, mazun fevral 26 künü kütleviy çatışmalarda iştirak etkeni içün 3,5 şartlı apis cezasına maküm etilgen.
