Şimdi Rusiye nezareti altında olğan Qırımğa qıtaiy Ukrainadan eletkrik energiyasınıñ berilmesi boyunca muqavelelerniñ imzalanuvı Ukraina Nazirler kabinetiniñ vazifesidir, dep bildirdi Ukraina Milliy mudafaa ve havfsızlıq hızmetiniñ (SNBO) başı Aleksandr Turçinov.
«Bu Ukraina Nazirler kabinetiniñ vazifesi, eger de Nazirler kabinetine energiyanı berüv meselesinde yardım kerek olsa, bunda (SNBO toplaşuvınıñ keçirilmesinde – QA) iç bir problem körmeyim», – dep bildire Turçinovnıñ sözlerini «İnterfaks-Ukraina».
Qırımtatar Milliy Meclisniñ reisi Refat Çubarov aytqanı kibi, qıtaiy Ukrainadan Qırımğa elektrikniñ berilmesi ile bağlı añlaşmalar yarımadanıñ Ukrainağa ait olğanı aqqında qaydlarsız imzalanılmaz.
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil.
Qırımğa dekabr 2 künü kelgen Rusiye prezidenti Vladimir Putin Kubanden Qırımğa energetik köpürniñ birinci yolağınıñ berilmesi tedbirinde iştirak etti.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
